¹¹Yeye apendaye moyo safi na yeye ambaye maneno yake ni ya neema, mfalme atakuwa rafiki yake.

¹²Macho ya Bwana hulinda maarifa, bali huyapinga maneno ya asiye mwaminifu.

¹³Mvivu husema, “Yuko simba nje!” au, “Nitauawa katika mitaa!”

¹⁴Kinywa cha mwanamke kahaba ni shimo refu; yeye aliye chini ya ghadhabu ya Bwana atatumbukia ndani yake.

¹⁵Upumbavu umefungwa ndani ya moyo wa mtoto, bali fimbo ya adhabu itaufukuzia mbali naye.

¹⁶Yeye amwoneaye maskini ili kujiongezea mali, naye ampaye tajiri zawadi, wote huwa maskini.

¹⁷Tega sikio na usikie misemo ya wenye hekima, elekeza moyo wako kwenye yale nifundishayo,

¹⁸kwa maana inapendeza unapoyahifadhi moyoni mwako na kuwa nayo yote tayari midomoni mwako.

¹⁹Ili tumaini lako liwe katika Bwana, hata wewe, ninakufundisha leo.

²⁰Je, sijakuandikia misemo thelathini, misemo ya mashauri na maarifa,

²¹kukufundisha maneno ya kweli na ya kuaminika, ili uweze kutoa majibu sahihi kwake yeye aliyekutuma?

²²Usiwadhulumu maskini kwa sababu ni maskini, wala kumdhulumu mhitaji mahakamani,

²³kwa sababu Bwana atalichukua shauri lao naye atawateka wao waliowateka.

²⁴Usifanye urafiki na mtu mwenye hasira ya haraka, usishirikiane na yule aliye mwepesi kukasirika,

²⁵la sivyo utajifunza njia zake na kujiingiza mwenyewe kwenye mtego.

²⁶Usiwe mwenye kupana mikono katika rehani, au kuweka dhamana kwa ajili ya madeni.

²⁷Kama ukikosa njia ya kulipa, kitanda chako kitachukuliwa ukiwa umekilalia.

²⁸Usisogeze jiwe la mpaka wa zamani lililowekwa na baba zako.

²⁹Je, unamwona mtu stadi katika kazi yake? Atahudumu mbele ya wafalme; hatahudumu mbele ya watu duni.